Tuesday, March 22, 2011

விஜய் படங்களுக்கு தடை

விஜய் படங்களுக்கு தடை; அசினுக்காக ‘காவலனுக்கு’ மட்டும் இலங்கை அனுமதி!

விஜய் படங்களுக்கு தடை; அசினுக்காக காவலனுக்கு மட்டும் இலங்கை அனுமதி!
கொழும்பு: விஜய்யின் படங்களுக்கு இனி இலங்கையில் அனுமதி இல்லை என்றும், ‘சிங்களர்களின் நட்பு நடிகை ‘ அசின் நடித்திருப்பதால் காவலன் படத்துக்கு மட்டும் அனுமதி அளிக்கப்படுவதாகவும் இலங்கை அரசு அறிவித்துள்ளது.
விடுதலைப்புலிகளுக்கு ஆதரவாக செயல்படும் தமிழ் நடிகர்களின் படங்களைத் திரையிடக்கூடாது என இலங்கை அரசு பட்டியலிட்டு வைத்துள்ளது.
இப்போது அந்தப் பட்டியலில் விஜய் படத்தையும் சேர்த்துள்ளது அந்நாட்டு அரசு. நாகையில் இலங்கை அரசைக் கண்டித்து நடந்த கூட்டத்தில் பங்கேற்ற விஜய், தமிழக மீனவர்களை இலங்கை கடற்படையினர் தாக்குவதை கடுமையாகக் கண்டித்தார்.
மீனவர்கள் மீதான தாக்குதலை நிறுத்த வேண்டும் என்றும் இங்குள்ளவர்கள் ஒன்று சேர்ந்து எதிர்த்தால் இலங்கை உலக வரைபடத்திலிருந்தே காணாமல் போய்விடும் எனறும் ஆவேசமாகப் பேசினார். இந்த பேச்சுக்கள் சிங்களர்களையும் இலங்கை அரசையும் ஆத்திரமூட்டியுள்ளது. ‘விஜய் படங்களை இலங்கையில் திரையிட அனுமதிக்கக்கூடாது’ என்று எதிர்ப்பு கிளம்பியுள்ளது.
இந்த நிலையில் விஜய், அசின் ஜோடியாக நடித்த காவலன் படம் இலங்கையில் திரையிட அனுப்பப்பட்டுள்ளது. இதற்கு அனுமதி அளிக்கலாமா வேண்டாமா என்பது குறித்து இலங்கை அரசு அதிகாரிகள் கூடி ஆலோசித்தனர்.
இறுதியில் ‘இலங்கையின் நட்பு நடிகையான’ அசின் இப்படத்தில் நடித்திருப்பதால் அவருக்காக படத்தை இலங்கையில் திரையிட அனுமதி அளிப்பதாக அறிவித்துள்ளனர்.
தமிழ் திரையுலகினர் தடையை மீறி சில மாதங்களுக்கு முன் அசின் இலங்கை சென்றார். அங்கு நடந்த இந்தி படப்பிடிப்பில் பங்கேற்றார்.
பிற நடிகர்கள் இலங்கை பயணத்தை தவிர்த்த நிலையில் அசின் இலங்கைக்கு வந்ததோடு, அந்நாட்டு அதிபர் ராஜபக்சே மனைவி ஷ்ராந்தியுடன் நல்ல சினேகமாகிவிட்டார்.
இலங்கை அரசின் சார்பில் நடத்தப்பட்ட கண் சிகிச்சை முகாமுக்கு சிறப்பு அழைப்பாளராகப் போனார். தமிழர்களை அந்நாட்டு அரசு சிறப்பாகப் பார்த்துக் கொள்வதாகவும், விஜய், சூர்யா போன்ற நடிகர்கள் இலங்கைக்கு வரவில்லையே என்று தமிழர்கள் தன்னை ஆவலுடன் கேட்டதாகவும் அவர் தெரிவித்தது நினைவிருக்கலாம்.
அசினின் இந்த சேவைக்காகவே அவரது படத்தை அனுமதித்துள்ளது இலங்கை!
இதுகுறித்து இலங்கை அரசு வெளியிட்டுள்ள செய்திக் குறிப்பு இது:
“தென்னிந்திய திரைப்பட நடிகர் விஜய் கடந்த வாரம் நாகபட்டினம் பகுதியில் நடத்திய கூட்டத்தில் இலங்கை அரசை கடுமையாக விமர்சித்திருந்தார்.
தமிழக மீனவர்கள் தொடர்ந்து கொல்லப்பட்டால் இலங்கையை உலக வரைபடத்தில் இருந்து அகற்றுவோம் என அவர் தெரிவித்தது இலங்கை அரசை கடும் சினமடைய வைத்துள்ளது.
உடனடியாகவே விஜய் நடித்த காவலன் படத்தை இலங்கையில் தடை செய்யுமாறு இலங்கை பாதுகாப்பு அமைச்சு, அரசு அதிகாரிகளைப் பணித்திருந்தது.
ஆனால் விஜய் படத்தை தடை செய்வதற்கு முன்னர், நாம் அதில் நடித்த கேரளா நடிகை அசின் தொடர்பில் கவனம் செலுத்தினோம். அசின் இலங்கை அரசுக்கு நெருக்கமானவர். பல எதிர்ப்புக்களின் மத்தியில் இலங்கைக்கு பயணம் செய்த அசின் தென்னிந்தியாவில் ஏற்பட்ட எதிர்ப்புக்களை மிகவும் சிறப்பாக முறியடித்திருந்தார்.
மகிந்தாவின் மனைவி ஷிராந்தியாருடன் யாழ்ப்பாணத்திற்கும் அசின் சென்றிருந்தார். விஜய் உண்மையில் தமிழ் மக்கள் அக்கறை கொண்டிருந்தால் தனது காவலன் படத்தில் அசினை நடிக்க வைத்திருக்கமாட்டார். இவற்றைக் கருத்தில் கொண்ட நாம் பின்னர் காவலன் படத்தை தடைசெய்யும் எண்ணத்தை கைவிட்டோம்”, என்று கூறப்பட்டுள்ளது

No comments:

Post a Comment